ដោយ : បន្ទាយ

អ៊ូប៊ុនរាចថានី -ថៃ ៖ កីឡាបាល់ទាត់កម្ពុជាទទួលបានចំណាត់ថ្នាក់លេខ១ ក្នុងការប្រកួតដណ្តើមពានរង្វាន់កីឡាបាល់ទាត់មិត្តភាពឥណ្ឌូចិន ឆ្នាំ២០២៤ (មហាជន អាយុពី៤៥ឆ្នាំឡើង ឬU 45) នៅទីលានវាលស្មៅធម្មជាតិនៃសាកលវិទ្យាល័យអ៊ូប៊ុនរាចថានី រាចផាត់ ខេត្តអ៊ូប៊ុនរាចថានី ប្រទេសថៃ ភាគឦសាន កាលពីព្រឹកថ្ងៃឣាទិត្យទី២១ ខែកក្កដា ឆ្នាំ២០២៤ កន្លងមកនេះ ។

អ្នករៀបចំការប្រកួតនេះបានឲ្យដឹងនៅថ្ងៃទី២២ខែកក្កដាថា: ក្រុមបាល់ទាត់វ័យចាស់កងយោធពលខេមរភូមិន្ទ(ខភម) ដឹកនាំដោយលោកឧត្តមសេនីយ៍ទោ ខូវ ឆាយ ប្រធានសហព័ន្ធប្រដាល់គុនខ្មែរ និងលោឧត្តមសេនីយ៍ត្រី បោន ប៊ិន មេបញ្ជាការកងរាជឣាវុធហត្ថខេត្តបន្ទាយមានជ័យ បានចូលរួមប្រកួតដណ្ដើមពានរង្វាន់បាល់ទាត់មិត្តភាព “​ ប្រទេសក្នុងតំបន់ឥណ្ឌូចិន ឆ្នាំ២០២៤ “​ ឬThe Indochina Friendship Football Cup 2024 ដែលរៀបចំឡើងនៅខេត្តអ៊ុប៊ុនរ៉ាចថានី ប្រទេសថៃ ។

លើទីលានវាលស្មៅធម្មជាតិ ស្ថិតក្នុងសកលវិទ្យាល័យ អ៊ូប៊ុនរាចថានី រាចផាត់ កាលពីវេលាម៉ោង៩ព្រឹកថ្ងៃឣាទិត្យ ទី២១ ខែកក្កដា ឆ្នាំ២០២៤ ក្រុមបាល់ទាត់វ័យចាស់កងយោធពលខេមរភូមិន្ទ​ នៃព្រះរាជាណាចក្រកម្ពុជា​ ជួបប្រកួតវគ្គពាក់កណ្ដាលផ្ដាច់ព្រ័ត្រ​ ជាមួយក្រុមកីឡាករ​ខេត្តណាន ប្រទេសថៃ ។

ជាលទ្ធផលក្រុមបាល់ទាត់វ័យចាស់កងយោធពលខេមរភូមិន្ទ​នៃព្រះរាជាណាចក្រកម្ពុជាទទួលបាន (១) ចំណែក​ក្រុមកីឡាករ​ ខេត្តណាន ប្រទេសថៃ(០) ពោលគឺកីឡាករវ័យចំណាស់កម្ពុជាឈ្នះកីឡាករវ័យចំណាស់ថៃ ១-០។

លុះដល់ល្ងាចថ្ងៃ ខែ ឆ្នាំដដែល ក្រុមបាល់ទាត់វ័យចាស់កងយោធពលខេមរភូមិន្ទ​នៃព្រះរាជាណាចក្រកម្ពុជា នឹងជួបប្រកួតវគ្គផ្ដាច់ព្រ័ត្រ​ ជាមួយក្រុមកីឡាករមកពីប្រទេសឡាវ ដើម្បីដណ្ដើមជ័យលាភីលេខ១​ និងលេខ២ ។

ជាលទ្ធផលកីឡាករបាល់ទាត់កម្ពុជា(ក្រុមបាល់ទាត់វ័យចាស់កងយោធពលខេមរភូមិន្ទ​) ទទួលបានចំណាត់ថ្នាក់លេខ១ ឯក្រុមកីឡាករមកពីប្រទេសឡាវ ទទួលបានចំណាត់ថ្នាក់លេខ២ ។

នាឱកាសនៃការប្រកួតនោះ ក៏បានការចូលរួមគាំទ្រ(Fan) ពីពលរដ្ឋថៃ ពលរដ្ឋថៃពូជពង្សខ្មែរនិងនិស្សិតកម្ពុជាដែលកំពុងសិក្សានៅខេត្តអ៊ូប៊ុនរាចថានី ប្រទេសថៃផងដែរ ។

គួរបញ្ជាក់ដែរថា នោះជាការប្រកួតវិលជុំ នៃការប្រកួតពានរង្វាន់បាល់ទាត់មិត្តភាពឥណ្ឌូចិនឆ្នាំ២០២៤ ប្រព្រឹត្តទៅ២ថ្ងៃចុងសប្តាហ៍គឺថ្ងៃសៅរ៍ អាទិត្យ ទី២០-២១ ខែកក្កដាឆ្នាំ២០២៤ នាខេត្តអ៊ូប៊ុនរាចថានី ដោយមានកីឡាករវ័យចាស់អាយុចាប់ពី៤៥ឆ្នាំឡើងឬU-45 មកពីប្រទេសកម្ពុជា ឡាវ  វៀតណាមនិងថៃជាម្ចាស់ផ្ទះ ។

សូមរំលឹកដែរថា កន្លងមកក្រុមកីឡាបាល់ទាត់កម្ពុជា ក្នុងនោះមានក្រុមកីឡាបាល់ទាត់វ័យចំណាស់ខេត្តបន្ទាយមានជ័យដឹកនាំដោយលោកឧត្តមសេនីយ៍ត្រីបោន ប៊ិន ផងដែរ តែងបានចូលរួមប្រកួតតាមខេត្ត រាជធានីក្នុងប្រទេសនិងចេញទៅប្រកួតក្រៅប្រទេស ជាមួយក្រុមកីឡាបាល់ទាត់បរទេសនានាក្នុងបំណងលើកកម្ពស់វិស័យកីឡាបាល់ទាត់និងដើម្បីសុខភាព មិត្តភាព សាមគ្គីភាព សន្តិភាព សហប្រតិបត្តិការ ហើយនិយាយថាទេពីគ្រឿងញៀន…ជាដើម ៕